21/11/2024
O Salón de Graos da Facultade de Ciencias Económicas e Empresariais converteuse esta tarde nun espazo de reflexión e colaboración para máis de 30 asistentes, maioritariamente estudantes, no marco dos Diálogos Inspiradores. Este encontro, organizado polo Laboratorio de Innovación e Economía Social de Galicia (LIESGA) en colaboración coa Rede Eusumo, tivo como obxectivo conectar ideas e proxectos sobre produción sostible e economía social para transformar o sector agroalimentario galego.
O evento contou coa participación de destacadas voces do ámbito institucional, académico e cooperativista, incluíndo a Pablo Fernández, Secretario Xeral de Emprego; Loreto Fernández, representante de LIESGA; e Claudia Rodríguez, cooperativista de Alén S.Coop.Galega.
Baixo o lema “Diálogos Inspiradores”, os relatores analizaron os retos e oportunidades da economía social e do cooperativismo como motor dun futuro máis sostible. Pablo Fernández destacou o compromiso da Xunta de Galicia co impulso destas fórmulas de negocio, enfocadas en xerar emprego inclusivo, vinculado ao territorio e favorecendo un crecemento sostible a nivel económico, social e ambiental.
Entre as iniciativas sinaladas, subliñouse a importancia de liñas de axuda como o Bono Consolida Social para apoiar a consolidación destas entidades. Tamén se puxo en valor a Rede Eusumo como instrumento fundamental para o asesoramento técnico e o acompañamento de proxectos cooperativos.
Claudia Rodríguez, de Alén S.Coop.Galega, animou a mocidade a achegarse ao modelo cooperativo cunha perspectiva fresca e destacou o papel da súa cooperativa no fomento da economía circular como exemplo de innovación e compromiso co medio ambiente.
A actividade, enmarcada no programa 2023-2024 da Rede Eusumo, busca consolidar os Diálogos Inspiradores como un punto de encontro entre a universidade e a economía social para fomentar un futuro agroalimentario máis verde, responsable e sostible.