25/03/2025
No marco da campaña Tecnoloxía con Propósito de #ConectaESGalega, o Salón de Graos da Facultade de Ciencias Económicas e Empresariais da Universidade de Santiago de Compostela acolleu o evento “Diálogos Inspiradores: Tecnoloxía, Innovación e Economía Social”, unha cita que puxo en diálogo a universidade, as políticas públicas e o tecido cooperativo tecnolóxico galego.
O encontro abriu un espazo de reflexión sobre como a tecnoloxía, empregada desde modelos colaborativos e sostibles, pode ser un motor de transformación social e de desenvolvemento económico inclusivo. A xornada contou coa participación de representantes institucionais, expertos do ámbito universitario e protagonistas da economía social galega, que compartiron visións, experiencias e retos.
A Xunta aposta polo cooperativismo tecnolóxico
Na súa intervención, Covadonga Toca, directora do IGAPE, destacou o papel das startups cooperativas como modelo de futuro para Galicia, defendendo que son unha alternativa real ao modelo empresarial tradicional, xa que combinan viabilidade económica con propósito social. Ademais, sinalou que ao longo de 2025, o IGAPE activará máis de 172 millóns de euros en axudas orientadas á innovación, dixitalización e modernización do tecido produtivo galego, das que tamén poden beneficiarse as cooperativas tecnolóxicas e entidades da economía social.
Tamén puxo o foco na Oficina Económica de Galicia, un servizo que conta con máis de 100 profesionais especializados en financiamento, fiscalidade, emprendemento e tramitación.
Idearia Soluciones: innovación tecnolóxica con impacto social
Como exemplo práctico, Fran Otero, representante da cooperativa galega Idearia Soluciones, compartiu a súa experiencia como entidade de economía social cualificada como IEBT (Iniciativa de Emprego de Base Tecnolóxica). Conformada por un equipo multidisciplinar, Idearia desenvolve solucións avanzadas para sectores menos dixitalizados, apostando por unha tecnoloxía que contribúa ao benestar colectivo e promova o impacto social positivo.
A súa intervención puxo en valor o papel da tecnoloxía aplicada con propósito, así como o modelo cooperativo como estrutura ideal para combinar innovación, inclusión e sustentabilidade.
Universidade, innovación e economía social
A xornada foi un espazo de diálogo dirixido por María Bastida, investigadora do grupo LIESGA da USC, quen destacou o papel da universidade como catalizadora de proxectos cooperativos e tecnolóxicos.
O encontro serviu para evidenciar que a cooperación entre universidade, administración e economía social é clave para construír unha Galicia máis innovadora, conectada co territorio e centrada nas persoas.
Esta actividade enmárcase no programa de actuación 2024-2025 da Rede Eusumo. A Rede Eusumo é unha rede de colaboración impulsada pola Secretaria Xeral de Emprego e Relacións Laborais da Consellería de Emprego, Comercio e Emigración para o fomento do cooperativismo e a economía social que conta co financiamento do Ministerio de Traballo e Economía social.