15/10/2021
A docente e investigadora Loreto Fernández intervirá na mesa redonda dedicada á economía feminista e ao emprendemento colaborativo
Do 25 ao 30 de outubro a capital galega acollerá a III Feira de Emprendedoras de Compostela: As universitarias, un evento organizado polo Concello de Santiago e a Universidade de Santiago de Compostela.
Este ano, as protagonistas serán as universitarias, mulleres da contorna de Compostela e xurdidas da Universidade de Santiago, que apostan e lideran a creación dun tecido empresarial con valor engadido. O obxectivo da feira é darlle visibilidade e estas emprendedoras e crear un punto de encontro entre elas e as universitarias.
As xornadas combinarán sesións de corte teórico con visitas a empresas da comarca de Compostela ou mesas redondas para reflexionar sobre emprendemento, liderados femininos ou perspectiva de xénero.
Pola súa banda, o Laboratorio de innovación e economía social de Galicia estará presente na mesa ‘Economía feminista: emprendemento social, circular, sostible e centrado nas persoas. Emprendemento colaborativo’ do día 30 da man de Loreto Fernández, unha das impulsoras do proxecto e profesora titular do Departamento de Economía Financeira e Contabilidade da USC, directora do Equipo GEM Galicia investigadora adxunta ao Centro de Estudos Cooperativos.
Na mesa tamén participarán María Abelleira, da cooperativa MAOS Innovación Social, e Claudia Rodríguez, da cooperativa Alén, e estará moderada por Ana Olveira, investigadora en Cooperativismo e Economía Social na USC e outras das persoas responsables do LIES_GA.
Desde a seguinte ligazón pódese consultar o programa completo da III Feira de Emprendedoras de Compostela: As universitarias e formalizar a inscrición para asistir.