20/03/2025
A primeira edición do IMPACTTHON USC concluíu cun balance moi positivo, recoñecendo o traballo e a creatividade de seis equipos que desenvolveron cinco proxectos innovadores. Todas as iniciativas compartiron un obxectivo común: ofrecer solucións tecnolóxicas con impacto social e ambiental, aliñadas cos Obxectivos de Desenvolvemento Sostible (ODS). Durante varios días, estudantes, emprendedores/as e desenvolvedores/as colaboraron intensamente para transformar ideas en solucións reais, combinando innovación, tecnoloxía e emprendemento sostible.
Na categoría de emprendemento, o primeiro premio foi para EstudIa, unha aplicación deseñada para mellorar a accesibilidade do estudantado aos contidos das súas materias. Este proxecto, presentado por Lucía Pérez Moretti, Marta Martínez Paz, Raquel Lamas Fernández e Julián Neo Mariño, destacou pola súa capacidade para adaptar os materiais educativos ás necesidades do alumnado, facilitando unha aprendizaxe máis inclusiva e accesible. O segundo premio recoñeceu a OUVIA, outra app enfocada en optimizar a experiencia académica na USC, promovida por Anxo Fernández Martínez, Nahia Castro Novas, Paula Carreira Torneiro e Iria Campos Seoane. Finalmente, o terceiro premio recaeu en Senda Verde, unha iniciativa de Raúl Seara Suárez e Alexia Canosa que aposta polo desenvolvemento sostible, promovendo prácticas respectuosas co medio ambiente a través da tecnoloxía.
Na categoría de desenvolvemento, o proxecto que conseguiu o primeiro premio foi Medication Tracker, unha aplicación creada para mellorar o seguimento da medicación. A proposta, presentada por Pablo Lobato Rey, Pablo Seijo García, David Carpintero Díaz, Sócrates Agudo Torrado, Miguel Leal Fernández e Javier Pereira Romero, permite buscar medicamentos, rexistrar doses e levar un control do historial médico, facilitando o traballo dos profesionais sanitarios e mellorando a seguridade do paciente. O segundo premio foi para Green DOTS, unha app que permite descubrir e avaliar negocios sostibles en función da súa contribución aos ODS. O equipo formado por Martín González Dios, Sabela Pérez Quintana, Asier Cabo Lodeiro e Asier Acuña Casal logrou desenvolver unha ferramenta eficaz para promover un consumo máis responsable e consciente. O terceiro premio na categoría de desenvolvemento recaeu novamente en OUVIA, que conseguiu así un dobre recoñecemento nesta edición do IMPACTTHON USC.
A avaliación dos proxectos correu a cargo dun xurado composto por expertos en innovación, tecnoloxía e emprendemento. Entre eles, estiveron Luis Otero, delegado do reitor para Transferencia do Coñecemento; Loreto Fernández, profesora do Departamento de Economía Financeira; Natalia Seoane, profesora do Grao en Enxeñería Informática; Jorge Alberto Suárez Garea, profesor do Departamento de Electrónica e Computación da ETSE; e Berta Caro, directora corporativa de Tecalis. Estes profesionais valoraron criterios como a viabilidade técnica, o impacto social e ambiental, e a capacidade de escalabilidade dos proxectos.
O IMPACT THON USC non só foi unha competición, senón tamén un espazo de aprendizaxe e conexión, onde estudantes e profesionais puideron colaborar e intercambiar coñecementos. Durante a semana de desenvolvemento, os equipos participaron en sesións de mentoría e encontros diarios para compartir avances, recibir feedback e axustar as súas propostas. O evento culminou coa gran presentación final, na que os proxectos expostos demostraron un alto nivel de innovación e compromiso co ben común.
Esta iniciativa desenvolveuse coa colaboración da Vicerreitoría de Estudantes e Cultura a través das axudas para actividades de dinamización sociocultural, físico-deportiva e cultural. Ademais, enmárcase no programa de actuación da Rede Eusumo, impulsada pola Secretaría Xeral de Emprego e Relacións Laborais da Xunta de Galicia, na que a USC participa activamente a través da Área de Valorización, Transferencia e Emprendemento (AVTE).
O éxito desta primeira edición do IMPACT THON USC reafirma a importancia de promover iniciativas que conecten a tecnoloxía co impacto social e ambiental. Grazas a todas as persoas participantes, mentoras e organizadoras por facer posible esta experiencia de innovación e colaboración.