27/03/2025
O Centro de Estudos Cooperativos (CECOOP) da Universidade de Santiago de Compostela presentou no acto central da VI Semana Universitaria da Economía Social dúas ferramentas fundamentais para mellorar a visibilización, análise e toma de decisións no ámbito da economía social en Galicia: o novo portal estatístico GALESTAT e o Informe da Economía Social en Galicia 2023.
GALESTAT: un portal pioneiro ao servizo da análise e a planificación
Galicia convértese na primeira comunidade autónoma en dispoñer dun portal estatístico da economía social na súa propia lingua, seguindo as recomendacións do Plan de Acción Europeo da Economía Social. O portal GALESTAT nace como unha ferramenta aberta e accesible, que recolle os datos máis relevantes de cooperativas, sociedades laborais, centros especiais de emprego, empresas de inserción laboral, confrarías de pescadores ou comunidades de montes veciñais en man común.
O portal ofrece información actualizada sobre ingresos, empregos e número de entidades, así como unha recompilación histórica desde 1999, no caso das sociedades cooperativas e laborais. Ademais, inclúe glosarios, publicacións e materiais divulgativos de interese para investigadores, administracións públicas, emprendedores e entidades do sector.
O consello científico do portal está composto por persoal investigador das universidades de Santiago e Vigo e representantes de entidades como Espazocoop ou CIRIECSTAT, garantindo o rigor e a transversalidade dos datos ofrecidos.
Informe 2023: datos que confirman a boa saúde do cooperativismo galego
O Informe da Economía Social en Galicia 2023, elaborado tamén polo CECOOP, confirma o dinamismo e consolidación deste modelo empresarial na comunidade. Segundo os datos recollidos:
- En 2023 creáronse 138 novas cooperativas, a segunda cifra máis elevada da serie histórica, con 434 persoas socias promotoras (44% mulleres).
- Constituíronse 56 sociedades laborais, o que representa o 24% do total estatal, só por detrás da Comunidade de Madrid.
- Naceron 7 novos centros especiais de emprego, consolidando Galicia como referente na inclusión laboral de persoas con diversidade funcional.
No total, Galicia conta con 1.379 cooperativas, 689 sociedades laborais, 128 centros especiais de emprego, 14 empresas de inserción, 63 confrarías de pescadores, 1.039 sociedades agrarias de transformación e 3.029 comunidades de montes veciñais en man común.
Estes datos amosan a diversidade e fortaleza do ecosistema da economía social galega, así como o seu impacto en todo o territorio, especialmente no medio rural e nas zonas costeiras.
Experiencias que inspiran
No acto tamén se deron a coñecer experiencias de éxito como as de Paco & Lola, Galletas Mariñeiras, Coregal ou Primicías Raiña, que representan a pluralidade de sectores e modelos organizativos que caben na economía social.
Estas intervencións puxeron voz ao que os datos xa amosan: a economía social galega é diversa, resiliente, innovadora e con impacto real no territorio.