A USC acolle os ‘Diálogos Inspiradores: Universidade e Economía Social’, un encontro sobre tecnoloxía con impacto social

14/03/2025

• O evento contará con voces destacadas do sector para analizar retos e oportunidades da tecnoloxía no cooperativismo

O vindeiro 25 de marzo, a Universidade de Santiago de Compostela (USC) acollerá o evento “Diálogos Inspiradores: Universidade e Economía Social”, unha xornada clave para analizar o papel da tecnoloxía no desenvolvemento de modelos empresariais sostibles e cooperativos.

Este encontro, que terá lugar no Salón de Grados da Facultade de Ciencias Económicas e Empresariais, reunirá a expertos/as do ámbito da economía social e da innovación tecnolóxica para debater sobre o potencial das solucións dixitais con impacto social.

O obxectivo desta iniciativa é demostrar que a tecnoloxía e a economía social poden avanzar da man, impulsando innovacións sostibles que sitúen ás persoas e ao ben común no centro do desenvolvemento empresarial.

Para iso, contaremos coa participación de:

✔ Covadonga Toca, Directora Xeral do IGAPE.

✔ Fran Otero, representante de Idearia Soluciones S. Coop. Galega, con ampla experiencia en proxectos de economía social e tecnoloxía.

✔ María Bastida, investigadora de LIESGA, impulsora de iniciativas que conectan a universidade co sector cooperativo

O evento está dirixido a estudantes, profesionais, emprendedores/as e persoas interesadas en coñecer novas formas de emprendemento sostible, combinando tecnoloxía e impacto social. Durante a xornada, explorarase como a transformación dixital pode ser unha ferramenta clave para construír modelos de negocio máis xustos, democráticos e inclusivos.

A inscrición está aberta e pode realizarse a través do seguinte enlace.

Os ‘Diálogos Inspiradores’ forman parte da programación de ConectaESGalega, unha iniciativa que busca fomentar o diálogo entre a economía social e os sectores tecnolóxicos e innovadores en Galicia.